Street Artist : ‘ಯಾರೇ ಕೂಗಾಡಲಿ ಯಾರೇ ಹಾರಾಡಲಿ ನನ್ನ ನೆಮ್ಮದಿಗೆ ಭಂಗವಿಲ್ಲ’ ಎಂದು ಹೊರಟಂತಿದೆ ಈ ಅಜ್ಜ. ಹಣ್ಣುಹಣ್ಣಾದ ಈ ಆಧುನಿಕ ಗಂಧರ್ವನ ಕಲಾಸಾಹಸಪಯಣದಲ್ಲಿ ನೀವೂ ಜೊತೆಯಾಗಬೇಕೆ? ನೋಡಿ ಈ ವಿಡಿಯೋ.

Artist : ಕಲೆ ಎಂದರೆ ಹುಚ್ಚು, ಕಲೆ ಎಂದರೆ ಸಾಹಸ, ಕಲೆ ಎಂದರೆ ಪ್ರೀತಿ, ಕಲೆ ಎಂದರೆ ಬದುಕು, ಕಲೆ ಎಂದರೆ ಎದೆಗಂಟಿಕೊಂಡಂಥದ್ದು, ಅಂದರೆ ಕಲೆಯೇ ಉಸಿರು ಎನ್ನುವ ಅರ್ಥದಲ್ಲಿ. ಇದೀಗ ವೈರಲ್ ಆಗಿರುವ ಈ ವಿಡಿಯೋ ನೋಡಿ. ಹಣ್ಣುಹಣ್ಣಾದ ಈ ಅಜ್ಜ ದೊಡ್ಡದಾದ ಪಿಯಾನೋ ಅನ್ನು ತನ್ನ ಸೈಕಲ್ಲಿನಲ್ಲಿ ಅಳವಡಿಸಿಕೊಂಡು ಇತ್ತ ಪಿಯಾನೋ (Piano) ನುಡಿಸುತ್ತ ಮತ್ತು ಅಡ್ಡಡ್ಡವಾಗಿ ಸೈಕಲ್​ ತುಳಿಯುತ್ತ ಹೊರಟಿದ್ದಾನೆ.  ಹೊರಟಿರುವುದು ಯಾವುದೋ ಕಾಡಿನೊಳಗೆ ಅಲ್ಲ ಮತ್ತೆ ನಗರದ ಮುಖ್ಯ ರಸ್ತೆಯೊಳಗೆ! ಈ ವಯಸ್ಸಿನಲ್ಲಿಯೂ ಈತ ಈ ಬಹುಕೌಶಲವನ್ನು ಇಷ್ಟು ಜತನದಿಂದ ಕಾಪಾಡಿಕೊಂಡು ಬಂದಿದ್ದಾನೆಂದರೆ…

ಸೈಕಲ್​ನ ಲಯ ತಪ್ಪದಂತೆ ಪಿಯಾನೋ ಬೇಸುರ್ ಆಗದಂತೆ ಈತ ಹೀಗೆ ನಿರಾಯಾಸವಾಗಿ ಚಲಿಸುವುದು ನಿಜಕ್ಕೂ ಬೆರಗು ಹುಟ್ಟಿಸುವಂತಿದೆ. ಎದುರಿಗೆ ನೋಡಿಕೊಂಡು ಗಾಡಿ ಓಡಿಸುವ ನಮಗೆ ಅದೆಷ್ಟೋ ಆತಂಕಗಳನ್ನು ಮನಸ್ಸಿನಲ್ಲಿ ತುಂಬಿಕೊಂಡು ತಲೆಯನ್ನು ಮೊಸರು ಗಡಿಗೆ ಮಾಡಿಕೊಂಡಿರುತ್ತೇವೆ. ಆದರೆ ಈ ಬೀದಿಕಲಾವಿದ ಮಾತ್ರ ಅಪ್ಪಟ ಸಾಹಸಿಗ. ಈಗಲೇ ಈತ ಹೀಗಿದ್ದಾನೆಂದರೆ ಇನ್ನು ವಯಸ್ಸಿನಲ್ಲಿ!

17 ವರ್ಷಗಳಿಂದ ನಾನು ಕುಳಿತುಕೊಂಡು ಪಿಯಾನೋ ನುಡಿಸಲು ಪ್ರಯತ್ನಿಸುತ್ತಿದ್ದೇನೆ, ಇನ್ನೂ ನನ್ನ ಕೈಗಳು ಕೂತಿಲ್ಲ. ಆದರೆ ಈ ಅಜ್ಜ, ಅದ್ಭುತ! ನಿಮ್ಮ ಈ ಸಾಹಸ ಮತ್ತು ಕಲಾಮನೋಭಾವ ಹೀಗೇ ವೃದ್ಧಿಸಲಿ. ಈಗಿನ ಯುವಪೀಳಿಗೆಗೆ ಮಾದರಿಯಾಗಿರಲಿ ಎಂದು ಹೇಳಿದ್ದಾರೆ ಒಬ್ಬರು.

ನೆಟ್ಟಿಗರ ಕಣ್ಣಿಗೆ ಈ ಅಜ್ಜ ಇನ್ನೂ ಅಷ್ಟಾಗಿ ಬಿದ್ದಂತಿಲ್ಲ ಈತನಕ ಈ ವಿಡಿಯೋ ಕೇವಲ 750 ಜನರ ಕಣ್ಣಿಗೆ ಬಿದ್ದಿದೆ. ಈ ಡಿಜಿಟಲ್ ಕಾಲದಲ್ಲಿ ತನ್ನ ಸಂಗೀತವನ್ನು ಯಾರು ಕೇಳುತ್ತಾರೆ, ತನ್ನ ಈ ಕಲಾಸಾಹಸವನ್ನು ಯಾರು ಶ್ಲಾಘಿಸುತ್ತಾರೆ ಅಂತೆಲ್ಲ ಎಣಿಸದೆ ತನ್ನ ಪಾಡಿಗೆ ತಾನು ವಿಹರಿಸುತ್ತಿದ್ದಾನೆ. ಈ ವಯಸ್ಸಿನಲ್ಲಿ ಕುಳಿತಲ್ಲಿಂದ ನಾಲ್ಕು ಹೆಜ್ಜೆ ನಡೆಯುವುದೇ ಅನೇಕರಿಗೆ ದುಸ್ತರ. ಆದರೆ ಈತನ ಈ ನಾದಪಯಣ ಎಷ್ಟೊಂದು ಶ್ರಮದಾಯಕವಾಗಿದೆ ನೋಡಿ.

ಈ ವಿಡಿಯೋ ನೋಡಿದ ನಿಮ್ಮ ಅಭಿಪ್ರಾಯವೇನು?